اللهاية للأطفال حديثي الولادة هل هي مفيدة أم مضرة

0 344

 

كثير من الأمهات بيحتاروا جدا في موضوع اللهاية  فمنهم اللي بيشوف انها مفيدة ومتقدرش تستغنى عنها ومنهم اللي بيشوف انها مضرة ومنهم اللي خايفة تجرب لأنه مفيش كلام واضح وصريح اه أو لا
مامي توك هتكلمكم عن موضوع اللهاية للأطفال حديثي الولادة بشكل علمي شوية ونسيب كل أم تكرر براحتها ⁦☺⁩ …. لأن الحقيقة القرار يرجع لكل ام واحتياجاتها واحتياجات طفلها

فوائد اللهاية للأطفال حديثي الولادة

_ تشبع الرغبة في المص عند الأطفال … الأطفال بيتولدوا برغبة شديدة في مص أي شئ ومنهم كمان اللي بيمص في صباعه حتى قبل ما يتولد … فالأطفال اللي بتكون عندهم الرغبة دي شديدة بيفضلوا يرضعوا وقت طويل مش عشان جعانين … لا علشان رغبتهم في المص فالسكاتة بتكون حل كويس في الحالة دي
_السكاتة مفيدة في حالة ركوب الطائرة وبتقلل من آلام الأذن والضغط على الأذن وقتها
_اللهاية كمان مفيدة في بعض الاجراءات الخاصة زي بعد الحقن والتطعيمات والتحاليل
_اللهاية “السكاتة ” بتقلل من متلازمة الموت المفاجئ
_اللهاية “السكاتة” بتهدي الطفل وتخليه يدخل في النوم اسهل
_الفطام من اللهاية “السكاتة” اسهل من كسر عادة مص الأصابع اللي بيلجئلها الطفل أحيانا

أضرار اللهاية للأطفال حديثي الولادة

_ بتزود من فرص الإصابة بعدوى الأذن الوسطى خاصة بعد الست شهور …قبل الست شهور فرص الإصابة بعدوى الأذن بتكون اقل
_ممكن تعمل مشاكل في الرضاعة بالنسبة للطفل خاصة لو الطفل اخذ السكاتة قبل ما يتمكن من الرضاعة بشكل سليم
_مشاكل الأسنان وده بيكون لو استمر استخدام اللهاية ” السكاتة” لبعد سنتين
_لو الطفل اتعود عليها الفطام منها بيكون صعب

ملحوظات عند ادخال اللهاية للأطفال حديثي الولادة

_ متدخليش اللهاية “السكاتة” قبل ما الطفل يتمكن من إلتقام الثدي والرضاعة بشكل سليم
_اختاري نوع يكون خالي من BPA وتكون بتدخل غسالة الأطباق لو عندك واحدة
_غيريها باستمرار بالمناسبة لسن طفلك
_اغسليها باستمرار بماء ساخن
_لو الطفل متقبلهاش مفيش إجبار عليها
_مياخدش السكاته عشان نأجل الرضاعة
_بعد الست شهور نقللها تدريجي
_ممنوع تثبيتها بدبوس أو لفها حول رقبته … خطر جدا

متى يكون استخدام اللهاية للأطفال حديثي الولادة ممنوع ؟

اذا كان وزن الطفل لا يزيد بشكل طبيعي نوقفها فورا لأن ده معناه أنه استغنى بها عن جزء من احتياجاته الغذائية

في النهاية مامي توك بتتمنى لكم ولأولادكم الصحة والعافية ونتمنى تكون مامي توك ساعدتكم تتخذوا القرار السليم

فاطمة رمضان

تعليقات
جاري التحميل...

Facebook