الإسعافات الأولية لنوبات الصرع أو التشنجات

0 236
الإسعافات الأولية للصرع

ممكن كلنا نتعرض لموقف أن اولادنا أو حد من اهلنا أو حتى حد في الشارع يحصله فجأة تشنجات  … سواء كان مصاب اصلا بصرع وده متكرر معاه أو دي اول مرة تحصله … مامي توك هقولك ازاي تتعاملي في الموقف ده صح وهنعلمك امتى ضروري تطلبي الإسعاف وهنعلمك الإسعافات الأولية للصرع

معنى التشنجات :

التشنجات هي عبارة عن حركات لا إرادية من جسم الشخص المصاب … فجأة بيتحرك حركات غصب عنه ومبيكونش قادر يسيطر على جسمه وممكن يطلع رغاوي من فمه ويقع على الأرض

ايه التصرف الصحيح في الوقت ده كإسعاف اولى

حضرتك لازم تعرفي أن دورك كمسعف بس انك تحافظي عليه بأمان بدون ما يأذي نفسه أو يأذي غيره لحد ما النوبة تخلص … مش دورك خالص انك تحاولي توقفي النوبة

خطوات الإسعافات الأولية  للصرع

_سيبي الشخص في مكانه …بس أمني المكان حواليه كويس بمعنى انك تشيلي كل حاجة حواليه ممكن تأذيه لو اتخبط فيها أو وقع عليها
_لو في حاجة حوالين رقبته زي طرحة أو كوفية شيليها براحة بدون إجبار … متحاوليش ابدا تجبري اي حد في نوبة تشنجات على اي حاجة
_حطي حاجة تحت دماغه زي مخدة أو بطانية أو فوطة مطبقة أو اي حاجة وبردو براحة بدون إجبار احنا بنعمل كده بس عشان رأسه متتخبطش جامد
_خليك جنبه لحد ما يتحسن أو توصله مساعدة
_ابعد عنه أي مثير ضوئي أو صوتي زي الضوء الشديد الصاخب والأصوات العالية
_اطلب الإسعاف لو كان محتاجها

دي توصيات الصليب الأحمر 

متى نطلب الإسعاف في نوبة التشنج

_لو النوبة اول نوبة تشنج للمصاب
_لو النوبة استمرت أكثر من خمس دقائق
_لو المصاب كان مريض سكر
_لو النوبة اتكررت اكثر من مرة
_لو المصاب وقت النوبة أذى نفسه بأي شكل
_لو الشخص فقد الوعي

ممنوعات وقت النوبة

_اجبار المصاب على اي شئ أو محاولة السيطرة عليه لأن النتيجة في الحالة دي أذى لك او له
_متحاولش تحط اي حاجة في فم المريض ممكن يختنق … ومتحاولش تفتح فمه بالعافية ممكن تسببله كسر في الفك أو يقفل على ايدك ويحصلك أذى شديد
_ متقرأش ولا تقول اي كلام جانب أذنه لأن كده انت بتثيره اكثر

في النهاية مامي توك بتتمنى لكم ولأولادكم الصحة والعافية وحسن التصرف

⁦ وممكن تلاقوا مقالات تانية عن الإسعافات الأولية على موقعنا

تعليقات
جاري التحميل...

Facebook